Kamboca və Tailand arasında artan gərginlik ABŞ prezidenti Donald Trampın birbaşa vasitəçiliyi nəticəsində azaldılıb. İki ölkə dərhal və qeyd-şərtsiz atəşkəs barədə razılığa gəliblər.
Bu barədə Kambocanın Baş naziri Hun Manet iyulun 26-da ABŞ prezidenti ilə telefon danışığından sonra məlumat verib.
O bildirib ki, Tramp münaqişə zonasında insan tələfatı ilə bağlı dərin narahatlığını ifadə edib və bölgədə sülhə dəstəyini bir daha vurğulayıb.
“Prezident Tramp daha çox ölüm və yaralanmalara səbəb ola biləcək hər hansı müharibənin qarşısının alınmasında maraqlıdır. Onun beynəlxalq münaqişələrin həllində vasitəçilik təcrübəsi böyükdür”, – deyə Hun Manet qeyd edib.
Danışıqlar zamanı Kamboca tərəfi dərhal atəşkəsə razı olduğunu bildirib. Tramp həmçinin Tailandın Baş naziri vəzifəsini icra edən Phumtham Veçayaçai ilə danışdığını və onun da atəşkəs təklifini qəbul etdiyini Hun Manetə çatdırıb.
Atəşkəs razılaşmasının tez bir zamanda reallaşması üçün Kambocanın Baş nazirinin müavini və xarici işlər naziri Prak Sokhona ABŞ-nin dövlət katibi Marko Rubio və Tailandın xarici işlər naziri Marit Sanqiamponq ilə birbaşa koordinasiya aparmaqla vəzifələndirilib.
//milli.az