“Hadisə nəticəsində hər hansı insan itkisi qeydə alınmayıb”.
Bunu “Bakı Metropoliteni” QSC-nin mətbuat xidmətinin rəhbəri Bəxtiyar Məmmədov deyib.
Qeyd edib ki, sərnişin təhlükəsizliyi prioritet olduğu üçün dərhal bütün stansiyalarda sərnişin axınının tənzimlənməsi istiqamətində tədbirlər görülüb, müvafiq təlimatlar verilib və müraciətlərə operativ şəkildə baxılıb.
Bildirib ki, hadisə baş verən zaman metro xətlərində ümumilikdə 30 qatar olub, onlardan yalnız dördü tuneldə qalıb:
“Sərnişinlərin təxliyəsi qısa müddətdə və təhlükəsizlik qaydalarına uyğun şəkildə uğurla həyata keçirilib. Hər hansı sərnişinin özünü pis hiss etməsi və ya şikayətlə bağlı müraciət daxil olmayıb”.
Eyni zamanda nəzərə çatdırıb ki, insidentin səbəblərinin araşdırılması üçün dərhal texniki yoxlamalara başlanılıb:
“Bütün versiyalar detallı şəkildə təhlil ediləcək və nəticələr ictimaiyyətə açıqlanacaq”.
Nəzərə çatdırıb ki, metro xətlərinə elektrik enerjisinin verilməsi saat 14:14-də bərpa edilib. Bundan sonra saat 15:00-a qədər qatarların hərəkəti yoxlanılıb və tənzimlənib, saat 15:00-dan etibarən isə sərnişinlərin qəbulu yenidən başlayıb:
“Hazırda metro normal qrafik üzrə fəaliyyətini davam etdirir və bütün stansiyalar sərnişinlərə xidmət göstərir”.
//milli.az