Mayın 17-22-də Bakı dünyanın ən mühüm beynəlxalq tədbirlərindən birinə ev sahibliyi edəcək. BMT-nin UN-Habitat proqramı tərəfindən təşkil olunan Dünya Şəhər Forumunun 13-cü sessiyası (WUF13) çərçivəsində qlobal mənzil böhranı, şəhərlərdə artan iqlim riskləri və davamlı urbanizasiya məsələləri müzakirə olunacaq.
“Dünyanı mənzillə təmin etmək: təhlükəsiz və dayanıqlı şəhərlər və icmalar” mövzusu ilə keçiriləcək forum Azərbaycan hökumətinin ev sahibliyi ilə baş tutacaq. Tədbirdə hökumət nümayəndələri, beynəlxalq təşkilatlar, maliyyə qurumları, şəhərsalma mütəxəssisləri və akademik dairələrin təmsilçiləri iştirak edəcəklər.
Forumun əsas diqqət mərkəzində dünya üzrə dərinləşən mənzil problemi, yaşayış yerlərinin əlçatanlığının azalması, şəhər bərabərsizliyi və iqlim dəyişikliklərinin şəhərlərə təsiri dayanacaq.
Tədbirdə BMT sisteminin yüksək səviyyəli nümayəndələri də çıxış edəcəklər. Onların arasında Beynəlxalq Miqrasiya Təşkilatının baş direktor müavini Uqoçi Daniels, BMT-nin Cənub-Cənub Əməkdaşlığı Ofisinin direktoru Dima Əl-Xətib və BMT-nin Səhralaşma ilə Mübarizə Konvensiyasının rəhbərliyində təmsil olunan Andrea Meza Murillo yer alır.
Forum çərçivəsində keçiriləcək əsas dialoqlardan biri “Qlobal mənzil böhranı: plan nədir?” mövzusuna həsr olunacaq. Sessiyada məşhur iqtisadçı və Kolumbiya Universitetinin professoru Ceffri Saks, Habitat for Humanity təşkilatının rəhbəri Conatan Rekford və digər beynəlxalq ekspertlər çıxış edəcəklər.
Müzakirələrdə mənzil əlçatanlığının azalması, sosial bərabərsizlik, idarəetmədəki boşluqlar və şəhərlərin sürətli böyüməsinin yaratdığı problemlər əsas mövzu olacaq.
Digər diqqətçəkən sessiyalardan biri isə iqlim və mənzil əlaqəsinə həsr olunacaq. Burada aşağı karbonlu yaşayış modelləri, iqlim risklərinə qarşı dayanıqlı şəhərlər və həssas əhali qruplarının qorunması məsələləri ön plana çıxarılacaq.
Forumda həmçinin Afrikada əlçatan mənzil təşəbbüsü, mədəni irsin qorunması və inklüziv şəhər yenilənməsi ilə bağlı xüsusi sessiyalar təşkil ediləcək.
Bakıda keçiriləcək WUF13 tədbiri hökumətləri, beynəlxalq təşkilatları, biznes nümayəndələrini və vətəndaş cəmiyyətini bir araya gətirərək şəhərlərin gələcəyi ilə bağlı qlobal əməkdaşlığı gücləndirməyi hədəfləyir.
Qeyd edək ki, Dünya Şəhər Forumu 2001-ci ildə BMT tərəfindən yaradılıb və davamlı urbanizasiya sahəsində dünyanın ən böyük platformalarından biri hesab olunur.