“Xəzər regionunda iqlimədavamlı şəhər və icmalar: Urbanistik adaptasiya üçün iqlim maliyyəsinin səfərbər edilməsi” adlı bu tədbir 19 may tarixində Azərbaycan Respublikasının ekologiya və təbii sərvətlər nazirliyi ilə BMT-nin Məskunlaşma Proqramının (UN-Habitat) təşəbbüsü əsasında, eləcə də BMT-nin Ətraf Mühit Proqramı (UNEP) və Beynəlxalq Miqrasiya Təşkilatı (IOM) ilə tərəfdaşlıq çərçivəsində təşkil olunub.
Tədbirdə BMT-nin Məskunlaşma Proqramının (UN-Habitat) icraçı direktoru Anaklaudia Rossbax, UNEP-in icraçı direktorunun müavini Elizabet Maruma Mrema və Azərbaycan Respublikasının ekologiya və təbii sərvətlər nazirinin birinci müavini Ağakərim Səmədzadə açılış nitqi ilə çıxış ediblər.
Tədbir zamanı Xəzər regionunda iqlim dəyişmələrinin şəhərlər və sahilyanı icmalara təsiri, urbanistik adaptasiya sahəsində regional əməkdaşlığın gücləndirilməsinin əhəmiyyəti, eləcə də iqlimədavamlı şəhərsalma üçün iqlim maliyyəsinin və tərəfdaşlıqların səfərbər olunması üzrə imkanlar ətrafında müzakirələr aparılıb. İştirakçılar həmçinin ekoloji idarəetmə, sahilyanı şəhərlərin iqlimə davamlılığı və iqlim adaptasiyası üzrə innovativ həll variantları sahəsində təcrübə mübadiləsi aparıblar.
Eyni zamanda, tədbirdə iqlimədavamlı şəhərsalmanın təşviqi istiqamətində Azərbaycanın həyata keçirdiyi fəaliyyətlərə diqqət yetirilib. Bu fəaliyyətlər sırasında Adaptasiya Fondunun maliyyə dəstəyi çərçivəsində BMT-nin Məskunlaşma Proqramı (UN-Habitat) tərəfindən UNEP və IOM ilə birgə icra olunan “Azərbaycanda iqlimədavamlı şəhər və icmaların yaradılması” proqramı xüsusi qeyd edilib.
Tədbirdə Azərbaycan Hökumətinin nümayəndələri, BMT-nin aidiyyəti qurumları, beynəlxalq maliyyə institutları, layihələrin icrası üzrə tərəfdaşlar və özəl sektor təmsilçiləri iştirak ediblər.
WUF13 çərçivəsində Xəzər regionunda iqlimədavamlı şəhər və icmalara həsr olunmuş yüksək səviyyəli tədbir keçirilib
