Yaponiyanın Osaka şəhərində yerləşən “Wase Exhibition Hall”da böyük “Sumo Expo 2025” tədbiri keçirilib. Expoda iştirak edən 158 ölkədən yalnız beş ölkə – Azərbaycan, Ukrayna, Monqolustan, Seneqal və Yaponiyadan olan peşəkar idmançılar və rəsmi nümayəndələr bu möhtəşəm tədbirdə bir araya gəliblər.
Tədbirin əsas məqsədi 2026-cı ildə Bakıda keçiriləcək Sumo üzrə Dünya Çempionatının təbliği və bu yarışa qlobal marağın artırılması olub. Ölkəmizi bu mötəbər sərgidə Yapon Döyüş Növləri və Mədəniyyəti Assosiasiyası təmsil edib. Assosiasiyanın vitse-prezidenti Ülvi Ağamirov sərgidə çıxış edərək çempionatın rəsmi PR videosunu təqdim etməylə yanaşı, maskot AZUMO-nu ictimaiyyətə tanıdıb və hər kəsi Bakıya dəvət edib.
Həmçinin Azərbaycanın Yaponiyadakı Fövqəladə və Səlahiyyətli Səfiri Gürsel İsmayılzadə, Osaka Expo Azərbaycan Pavilyonunun direktoru Əvəz Muradov və onun komandası da tədbirdə iştirak etdilər. Diqqət çəkən məqamlardan biri də Yaponiyanın ən nüfuzlu 12 universiteti arasında keçirilən sumo çempionatında Azərbaycan Sumo yığmasının üzvü Cavid Yusifovun iştirak etməsi oldu. O, açıq çəki kateqoriyasında ilk görüşündə Yaponiya universitetləri üzrə çempion olmuş rəqibini məğlub edərək, ölkəmizi böyük fəxrlə təmsil edib.
“Sumo Expo 2025” həm idman, həm də mədəniyyət sahəsində beynəlxalq əlaqələrin genişləndirilməsi üçün əvəzolunmaz platforma oldu. Tədbir Azərbaycan idmanının dünya səhnəsində mövqeyinin daha da güclənməsinə mühüm töhfə verib.
