Avstriyada yeni mövsümə hazırlıqlarını davam etdirən “Qarabağ” bu gün təlim-məşq toplanışı çərçivəsində daha iki yoxlama görüşü keçirəcək.
Baş məşqçi Qurban Qurbanovun rəhbərlik etdiyi komanda günün ilk sınağında Ukrayna təmsilçisi “Xarkov”la qarşılaşacaq. Görüş Bakı vaxtı ilə saat 15:00-da başlayacaq.
Ağdam təmsilçisi ikinci yoxlama matçında isə Macarıstanın “Ferentsvaroş” klubu ilə üz-üzə gələcək. Bu qarşılaşmanın start fiti Bakı vaxtı ilə saat 19:30-da səslənəcək.
“Qarabağ” Avstriyadakı ilk yoxlama oyununda “Tirol” üzərində 4:0 hesablı inamlı qələbə qazanmışdı. Komanda bundan əvvəl Bakıda keçirdiyi sınaq matçında isə “Zirə”ni 4:3 hesabı ilə məğlub etmişdi.
Qeyd edək ki, bu görüşlər “Qarabağ”ın yeni mövsüm öncəsi hazırlıq proqramının mühüm hissəsini təşkil edir və məşqçilər korpusu futbolçuların hazırkı durumunu qiymətləndirmək imkanı əldə edəcək.
//milli.az