Azərbaycan Nəşriyyatı MMC-nin işi dövlət qəzetlərinin çapı ilə məhdudlaşmır. Nəşriyyat öz fəaliyyətini davam etdirəcək.
Nəzər.Media xəbər verir ki, bu barədə Teleqraf-a “Azərbaycan Nəşriyyatı”ndan məlumat verilib.
Bildirilib ki, əvvəlki illərdə “Azərbaycan” nəşriyyatına dövlət büdcəsindən dövlət sifarişinin icrası – “Respublika”, “Xalq qəzeti”, “Bakinski raboçi” və “Azərbaycan” qəzetlərinin çapı üçün maliyyə vəsaiti ayrılırdı. 2026-cı ildən etibarən isə bu vəsaitin birbaşa qəzetlərə ayrılacağı planlaşdırılır.
“Azərbaycan Nəşriyyatı” MMC digər istiqamətlər üzrə dövlət büdcəsindən vəsait almır. Yəni söhbət yalnız yuxarıda qeyd olunan qəzetlərin çapı üçün ayrılan vəsaitdən gedir. “Azərbaycan Nəşriyyatı” MMC-nin işi dövlət qəzetlərinin çapı ilə məhdudlaşmır. Nəşriyyat öz fəaliyyətini davam etdirəcək”,- vurğulanıb.
Qeyd edək ki, Hesablama Palatasının bu gün açıqlanan Azərbaycan Respublikasının 2026-cı il dövlət büdcəsinin rəyinə əsasən, gələn il dövlət büdcəsindən vəsait ayrılması nəzərdə tutulmayan qurumların siyahısı açıqlanıb. Həmin qurumlar sırasında Azərbaycan Nəşriyyatı da yer alıb.