Şair və aparıcı Nazilə Səfərli sosial media hesabında xanımlara arıqlamaq məqsədilə istifadə edilən “göbək iynələri” ilə bağlı xəbərdarlıq edib.
O, bu iynələrin sağlamlıq üçün ciddi təhlükələr yarada biləcəyini bildirib.
Nazilə Səfərli paylaşımında belə yazıb:
“Xanımlar, ehtiyatlı olun! Göbək iynələri vurdurmayın!”
O, yaxın tanıdığı bir həkimin başına gələn hadisəni misal çəkərək, vəziyyətin ciddiliyini izah edib:
“Çox sevdiyim bir həkim mədəsini kəsdirib, ardınca da o bahalı göbək iynəsindən istifadə edib ki, daha da arıqlasın. Nəticədə 60 kiloqram çəki itirib. Bu, normal deyil. İndi komada həyatla mübarizə aparır. Allah onu gözəl balalarına bağışlasın”.
Şairə hesab edir ki, sağlam şəkildə arıqlamaq üçün sadəcə şəkər və unlu qidaları rasiondan çıxarmaq kifayətdir.
O, qadınlara səslənərək özgüvənli olmalarını və sağlamlıqlarını təhlükəyə atmamağı tövsiyə edib:
“Özgüvəniniz olsa, artıq çəki dərd deyil. Özünüzü qoruyun. Evlər qadınsız olmasın”.