Azərbaycan məktəblərində noyabr tətilləri yaxınlaşır. Bu dövrdə şagirdlər internetdə daha çox vaxt keçirirlər: qadcetlərdə oyunlar oynayır, sosial mediadan istifadə edir və messencerlərdə söhbət edirlər. Mütəxəssislər qeyd edirlər ki, bu dövrdə uşaqların kibertəhlükəsizliyinə diqqət yetirmək xüsusilə vacibdir, çünki tətil zamanı onların sayıqlığı daha aşağı ola bilər.
“Uşaqlar çox vaxt potensial təhlükələrdən xəbərsiz olurlar: onlar asanlıqla yad adamlara etibar edir, naməlum tətbiqləri yükləyir və şəxsi məlumatlarını paylaşırlar. Valideynlərin uşaqlarına rəqəmsal gigiyena qaydalarını izah etmələri, onların istifadə etdiyi cihazlarının məxfilik parametrlərini yoxlamaları və şübhəli məzmuna girişi məhdudlaşdırmaları vacibdir”, – deyə Kaspersky-nin Azərbaycandakı rəsmi nümayəndəsi Müşviq Məmmədov bildirib.
Uşaqların onlayn müdafiəsi üçün ekspert məsləhətləri:
- Məxfilik parametrləri: Hesabları qapalı edin və kontaktlar çevrəsini məhdudlaşdırın.
- Məzmuna nəzarət: Valideyn nəzarətindən, filtrlərdən və təhlükəsiz axtarış sistemlərindən istifadə edin.
- Təhlükəsizlik təlimi: Uşaqlara saxta linkləri, şübhəli mesajları və təhlükəli tətbiqləri necə tanımağı öyrədin.
- Mütəmadi yoxlamalar: Quraşdırılmış tətbiqləri, sosial media parametrlərini və brauzer tarixçəsini vaxtaşırı nəzərdən keçirin.
- Ünsiyyət: Uşaqlarınızla hansı məlumatları paylaşa biləcəyini, hansıları gizli saxlamalı olduğunu müzakirə edin.
Kaspersky mütəxəssisləri xatırladırlar: rəqəmsal savadlılıq və valideyn nəzarəti uşaqlara risklərə məruz qalmadan internetdən təhlükəsiz istifadə etməyə, öyrənməyə və ünsiyyət qurmağa kömək edir.