Prezident İlham Əliyevin Şanxay Əməkdaşlıq Təşkilatının “ŞƏT plus” Zirvə toplantısında iştirakı və Çində faşizm üzərində qələbənin 80 illiyinə həsr olunmuş tədbirlərdə təmsil olunması Azərbaycanın beynəlxalq aləmdə nüfuzunun artdığını və strateji tərəfdaşlıq əlaqələrinin yüksək səviyyədə olduğunu göstərir.
Azərbaycan ilə Çin arasındakı əlaqələr qədim tarixə malikdir. Tarixi İpək Yolundan başlayaraq inkişaf edən münasibətlər, bu gün siyasi, iqtisadi və texnoloji sahələri əhatə edən geniş tərəfdaşlığa çevrilib. Prezident İlham Əliyev hər zaman Çinlə əməkdaşlığın gücləndirilməsinə önəm verib, bunun ölkəmizin qlobal mövqeyini möhkəmləndirdiyini vurğulayıb.
Çin dünya siyasətində və iqtisadiyyatında aparıcı rol oynayan dövlətlərdən biridir. Azərbaycanın strateji coğrafi mövqeyi, tranzit və investisiya imkanları, həmçinin etibarlı iqtisadi mühiti Çin üçün əməkdaşlıq perspektivlərini daha da artırır. Bu qarşılıqlı maraq və etimad üzərində qurulan münasibətlər, hər iki tərəf üçün uzunmüddətli strateji üstünlük deməkdir.
Azərbaycanın ŞƏT Zirvə toplantısında iştirakı yalnız diplomatik əlaqələrin genişlənməsi deyil, həm də regional balansın qorunması baxımından əhəmiyyətlidir. Bu səfər vasitəsilə Azərbaycan, Çinlə əlaqələri gücləndirməklə, həm regional iqtisadi layihələrdə iştirak imkanlarını artırır, həm də qlobal enerji və logistika şəbəkələrində strateji mövqeyini möhkəmləndirir.
Prezident İlham Əliyevin Çinə səfəri yalnız ikitərəfli əməkdaşlığın inkişafına deyil, həm də Azərbaycanın beynəlxalq platformalarda aktiv iştirakını gücləndirməyə xidmət edir. ŞƏT Zirvə toplantısında digər dövlət başçıları ilə görüşlər Azərbaycan üçün qlobal əməkdaşlıq imkanlarını genişləndirəcək və ölkəmizin etibarlı tərəfdaş imicini möhkəmləndirəcək.
//Fərid Şahbazlı, “İslahatçı Gənclər” İctimai Birliyinin sədri, siyasi şərhçi