“SOCAR-da hərc-mərclik də, qeyri-səmərəlilik də var idi. Hansı arqumentlər və hansı dəlillər hansı dövrü əhatə edir – bu, özü-özlüyündə bir sualdır”.
Bunu iqtisadiyyat naziri Mikayıl Cabbarov Milli Məclisin İqtisadi siyasət, sənaye və sahibkarlıq komitəsinin bugünkü iclasında “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı deyib.
Nazir bildirib ki, son beş ildə xalis mənfəəti iki dəfədən çox artıb:
“Vergi məbləğinin ödənilməsi ilə bağlı bəzi şərhlər yanlışdır. Məlumatlar açıqdır və müəssisələr yalnız mənfəət vergisini ödəyir kimi düşüncə doğru deyil. Müəssisələr tərəfindən ödənilən vergilər müxtəlifdir və fərqli növləri əhatə edir.
Dövlət müəssisələrinin fəaliyyətinin optimallaşdırılması hər zaman aidiyyəti strukturların diqqətindədir və bundan sonra da olacaq. Hər hansı şirkətin, o cümlədən SOCAR-ın fəaliyyəti ilə bağlı suallar varsa, müvafiq şəkildə ünvanlanmalıdır, xüsusilə deputatlar tərəfindən səsləndirilirsə, mən əminəm ki, bu suallar cavablandırılacaq”.
//milli.az