İranda Müctəba Xameneinin taleyi yenidən müzakirə olunur. Nəzər.Media Türkiyənin “Hürriyət” qəzetinə istinadən xəbər verir ki, onun uzun müddətdir ictimaiyyət qarşısına çıxmaması diqqət çəkir.
Bəzi beynəlxalq mənbələr Müctəba Xameneinin hücum zamanı yaralandığını iddia edir. Lakin bu məlumatlar rəsmi şəkildə təsdiqlənməyib. İran hakimiyyəti onun səhhətinin yaxşılaşdığını və idarəetmə ilə əlaqədə olduğunu açıqlayıb. Buna baxmayaraq, ekspertlər müxtəlif ehtimalların gündəmdə qaldığını bildirirlər. İddialara görə, o, təhlükəsizlik səbəbindən gizli yerdə saxlanıla və ya ciddi sağlamlıq problemləri yaşaya bilər. Bəzi təhlillərdə isə qərarların getdikcə daha çox İnqilab Keşikçiləri Korpusu tərəfindən verildiyi vurğulanır. Ekspertlər hesab edirlər ki, uzun sürən səssizlik ölkədə siyasi qeyri-müəyyənliyi daha da artırır. Bununla yanaşı, bütün bu iddiaların müstəqil mənbələr tərəfindən təsdiqlənmədiyi qeyd olunur.
//Nəzər.Media