Bakıda keçirilən çimərlik güləşi üzrə Dünya Seriyasının IV mərhələsi başa çatıb. Kişilərin mübarizəsində 90 kq çəki dərəcəsində mübarizə aparan Əşrəf Aşırov fəxri kürsünün birinci pilləsinə qalxıb. Qızıl medala sahib olan güləşçimiz Aşırov öz təəssüratlarını Nəzər.Media saytı ilə bölüşüb.
“Çox sevincliyəm. Bakıda keçirilən çimərlik güləşi üzrə Dünya Seriyasının IV mərhələsində qızıl medal qazandım. Gözəl atmosfer var idi. Gözəl dəstək gördüm. Ümidlər böyükdür. V seriya bilirsiniz ki, Yunanıstandadır. Orada da qələbə qazanıb Dünya Çempionu olmaq istəyirəm”, – deyə Əşrəf Aşırov bildirib.
Əşrəf Aşırov çimərlik güləşi ilə sərbəst güləş arasında fərqin olmadığını bildirib.
“Güləş güləşdir, fərqi yoxdur. Hər birində mübarizə var. Məşqçilərimlə belə qərara gəldik ki, bu il çimərlik güləşində mübarizə aparım. Bunu heç fikirləşməmişəm. Çimərlik güləşi yoxsa döşək güləşi arasındakı fərq qoymamışam. İnşallah, bunu vaxt göstərəcək. Mən sərbəst güləşdə də nəticə qazanmışam. Bu il isə birinci dəfədir ki, çimərlik güləşində iştirak edirəm. Hər ikisi güləşin bir növüdür. Məncə, bunlar arasında müqayisə aparmağa ehtiyac yoxdur”, – deyə qalib pəhləvanımız bildirib.
//Nəzər.Media