Türkiyənin İstanbul şəhərinin Zeytinburnu rayonunda botoks prosedurundan sonra yaşanan hadisə diqqət çəkib.
Toy hazırlığında olan gənc qadın özünü həkim kimi təqdim edən şəxsin evində botoks etdirib. Prosedurdan sonra isə onun göz qapağında sallanma yaranıb.
Məlumata əsasən, yanlış inyeksiya nəticəsində yaranan problemin bir neçə ay davam edə biləcəyi bildirilib. Bu vəziyyətlə üzləşən qadın hüquq-mühafizə orqanlarına müraciət edərək həmin şəxsdən şikayətçi olub.
Zərərçəkən qadın bildirib ki, botoksun təsiri keçdikdən sonra vəziyyətinin normallaşacağı deyilib. O, insanların bu cür hallara qarşı diqqətli olmasının vacibliyini vurğulayıb və başqalarının da eyni problemlə üzləşməsini istəmədiyini qeyd edib.
Gənc qadın həmçinin qarşıdan gələn toy mərasimi ilə bağlı ciddi narahatlıq keçirdiyini bildirib. Onun sözlərinə görə, bir neçə aydan sonra keçiriləcək toyunun hazırkı vəziyyətinə görə təxirə salınması ehtimalı da var.
Hadisə sosial şəbəkələrdə geniş müzakirələrə səbəb olub. İstifadəçilər estetik prosedurlar zamanı yalnız peşəkar və lisenziyalı mütəxəssislərə müraciət etməyin vacibliyini vurğulayıblar.
//milli.az