Yeni qaydalara əsasən, dövlətə məxsus torpaq sahələrinin illik icarə ödənişi artıq onların bazar qiyməti nəzərə alınmaqla hesablanacaq. Qərarda qeyd olunur ki, Bakı şəhərində torpağın bazar dəyərinin 3 faizi, digər şəhər və rayonlarda isə 2 faizi əsas götürülərək müvafiq əmsallar tətbiq ediləcək.
Daşınmaz əmlak sahəsi üzrə ekspert Ramil Osmanlı bildirib ki, qəbul edilən dəyişiklik dövlət torpaqlarının iqtisadi dövriyyəyə daha aktiv şəkildə cəlb olunmasına imkan yaradacaq.
Onun sözlərinə görə, əvvəlki sistemdə belə əmsallar tətbiq edilmirdi və yeni mexanizm xüsusilə iri torpaq sahələri üçün icarə xərclərinin əhəmiyyətli dərəcədə azalmasına səbəb olacaq.
Ekspert hesab edir ki, bu addım həm sahibkarlar, həm də torpaqdan istifadə imkanlarını genişləndirmək istəyən şəxslər üçün əlverişli şərait yaradır.
Azərbaycan Qiymətləndiricilər Cəmiyyətinin sədri Vüqar Oruc məsələ ilə bağlı qeyd edib ki, yeni yanaşma dövlət torpaqlarının icarəyə verilməsi prosesində daha aydın və şəffaf mexanizmlərin formalaşmasına kömək edəcək.
//milli.az