Braziliyalı model Kris Qalera qeyri-adi addımı ilə dünya mediasının diqqətini çəkib. Model təmtəraqlı toy mərasimi keçirərək öz-özü ilə evlənib, lakin bu münasibət cəmi üç ay davam edib.
Nəzər.Media lent.az-a istinadən bildirir ki, Braziliyada əsasən alt geyimləri reklamı ilə məşhurlaşan Kris Qalera San-Pauluda toy mərasimi təşkil edib. O, ağ gəlinlik geyinib, əlində gəlin buketi ilə mərasimə qatılıb.
Model bununla özünə olan sevgisini qeyd etmək istədiyini bildirib. Toyda bəyin olmaması isə mərasim iştirakçılarının diqqətini çəkib.
Qalera saç və makiyajını da özü hazırlayıb. Onun sözlərinə görə, bu addımla xoşbəxt olmaq üçün həyatında mütləq bir tərəfdaşın olmasına ehtiyac duymadığını göstərmək istəyib. Hadisədən sonra model haqqında müxtəlif xarici KİV-lərdə geniş yazılar yayımlanıb.
Sosial şəbəkələrdə bir çox qadın onun qərarını dəstəkləyib. Kişilərdən isə modelə evlilik təklifləri gəlib. Lakin Kris həmin vaxt bu təkliflərin hamısını rədd edib.
“Özü ilə evliliyi” cəmi 3 ay çəkdi
Toydan sonra Qalera özündən heç vaxt boşanmayacağını və özünü daim sevəcəyini deyib. Model bal ayını Paris və Londonda keçirib.
Lakin cəmi üç ay sonra vəziyyət dəyişib və Kris simvolik evliliyinə son qoymaq qərarına gəlib. Buna səbəb onun həyatında real bir kişinin peyda olması olub. Model yeni sevgilisinin adını açıqlamayıb.
Beləliklə, özünə sevgisini nümayiş etdirmək üçün toy edən Kris Qaleranın qeyri-adi evliliyi cəmi üç ay davam edib.