Azərbaycan əsilli rusiyalı reper Navai (Nəvai) Bəkirov Qazaxıstanda saxlanılaraq azadlığa buraxıldıqdan sonra Kişinyovda keçiriləcək konsertinə biletlərin satışını bərpa edib.
Bu barədə “Shot” məlumat yayıb.
Məlumata görə, hazırda reperin yalnız Moldovanın paytaxtında baş tutacaq konsertinə bilet almaq mümkündür. Sənətçinin saxlanılmasından sonra oktyabrın 16-dan dekabrın 8-nə təxirə salınan konsertin biletləri yenidən satışa çıxarılıb. Digər konsertlər isə hələ də təxirə salınmış vəziyyətdədir. Onların arasında sabah Moskvada keçirilməsi planlaşdırılan çıxış da var.
Qeyd edək ki, Navai oktyabrın 13-dən 14-nə keçən gecə Qazaxıstandakı “Korday” sərhəd-keçid məntəqəsində saxlanılıb. Avtomobilə baxış zamanı polis əməkdaşları narkotik maddə aşkar ediblər. Reper narkotik maddələrin qaçaqmalçılığına cəhddə şübhəli bilinirdi.
Oktyabrın 20-də Jambıl vilayətinin Polis Departamenti TASS-a açıqlamasında reper barəsində cinayət işinə reabilitasiya hüququ verməyən əsaslarla xitam verildiyini bildirib. Qərar hüquq pozuntusunun ilk dəfə törədilməsi və Bəkirovun əməlindən səmimi peşmanlıq çəkməsi nəzərə alınaraq qəbul edilib.
Bundan sonra Navai Qazaxıstan ərazisindən deportasiya olunub.
//milli.az