01 iyun 2026-cı il tarixində, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “Azərbaycan Talassemiya Federasiyası” ictimai birliyinin təşkilatçılığı ilə “Talassemiyalı Pasiyentlər üçün Yay Məktəbi” layihəsi keçiriləcəkdir.
Nəzər.Media xəbər verir ki, layihə irsi qan xəstəliyi olan talassemiyadan əziyyət çəkən şəxslərin tibbi savadlılığının artırılması, onların sağlamlıqla bağlı məlumatlandırılması və cəmiyyətə inteqrasiyasına dəstək məqsədi daşıyır. Tədbir çərçivəsində iştirakçılara talassemiyanın düzgün idarə olunması, müalicə prosesi, qidalanma, psixoloji dəstək və sağlam həyat tərzi ilə bağlı maarifləndirici məlumatlar təqdim ediləcəkdir.
Layihə zamanı müxtəlif sahələr üzrə mütəxəssislərin çıxışları, maarifləndirici sessiyalar və iştirakçılar üçün interaktiv görüşlər təşkil olunacaqdır. Tədbirin əsas məqsədi talassemiyalı şəxslərin həyat keyfiyyətinin yüksəldilməsinə töhfə vermək, onların sosial fəallığını artırmaq və xəstəliklə mübarizədə motivasiya yaratmaqdır.
“Talassemiyalı Pasiyentlər üçün Yay Məktəbi” layihəsi həmçinin cəmiyyətin diqqətini talassemiyalı şəxslərin problemlərinə yönəltmək, onların hüquq və ehtiyacları barədə ictimai məlumatlılığı artırmaq baxımından mühüm əhəmiyyət daşıyır.
